இராஜபக்சவின் பொய்ப் பிரச்சாரம்!

இராஜபக்சவின் பொய்ப் பிரச்சாரம்!
இந்திய அரசும், பாஜகவினரும் ஏமாறக்கூடாது!
தொல். திருமாவளவன் வேண்டுகோள்!

 
இலங்கையில் நடக்கவிருக்கும் அதிபர் தேர்தலில் வெற்றி பெறுவதற்காக எல்லாவிதமான ஏமாற்று வழிமுறைகளையும் இராஜபக்சே கையாண்டு வருகிறார். தமிழ்நாட்டுத் தொலைக்காட்சி ஒன்றுக்கு அவர் அளித்த நேர்காணல் அதற்கு சாட்சியமாக இருக்கிறது.

"தமிழக மீனவர்களைத் தாக்கக்கூடாது எனக் கண்டிப்பாகக் கூறியிருக்கிறோம்" என இராஜபக்சே சொல்கிறார். ஆனால் உண்மை என்ன என்பதை உலகம் அறியும். ஒவ்வொரு நாளும் தமிழக மீனவர்கள் தாக்கப்படுகிறார்கள்.  வலைகள் நாசமாக்கப்படுகின்றன. மீனவர்கள் சிங்களக் கடற்படையால் கைது செய்யப்படுகிறார்கள். படகுகள் பறிமுதல் செய்யப்படுகின்றன. பாதிக்கப்பட்ட மீனவர்கள் தொடர்ந்து போராடிக்கொண்டிருக்கிறார்கள்.

வடக்கு மாகாணத்துக்கு அதிகாரப் பகிர்வு செய்யப்படவில்லையே எனக் கேட்டால் அவர்களுக்கு ஆட்சி நடத்தத் தெரியவில்லை எனக் கேலி பேசுகிறார். தமிழர் பகுதிகளில் தொடர்ந்து சிங்கள ராணுவத்தை நிறுத்தி வைத்தும்; தமிழர்களின் நிலங்களையெல்லாம் அபகரித்துக்கொண்டு அங்கே சிங்களவர்களைக் குடியேற்றியும்; இந்துக் கோயில்களை இடித்துவிட்டு பௌத்தக் கோயில்களைக் கட்டியும் அட்டூழியம் செய்துவரும் இராஜபக்சே அரசு தமிழர்கள் தமது வீட்டில் ஏதேனும் நிகழ்ச்சிகள் நடத்தினால்கூட ராணுவத்திடம் அனுமதிபெறவேண்டும் என வலியுறுத்திவருகிறது. இந்தியா பலமுறை வலியுறுத்தியும்கூட 13 ஆவது சட்டத் திருத்தத்தின் அடிப்படையில் அதிகாரப் பகிர்வு செய்ய மறுக்கிறது. இத்தனை அநீதிகளையும் செய்துகொண்டு தமிழர்களை நான் சமமாக நடத்துகிறேன் என இராஜபக்சே சொல்வது கேலிக்கூத்தே தவிர வேறல்ல.

இந்தியப் பெருங்கடலில் அண்மைக்காலமாக சீனப் போர்க்கப்பல்களின் நடமாட்டம் அதிகரித்து வருகிறது. அவற்றுக்கு இலங்கைத் துறைமுகங்கள் திறந்துவிடப்பட்டுள்ளன. இதனால் இந்தியாவின் பாதுகாப்புக்கு மிகப்பெரும் அச்சுறுத்தல் ஏற்பட்டுள்ளது. "இந்தியா எங்களுக்கு உறவு சீனா எங்களுக்கு நட்பு" எனக் கூறும் இராஜபக்சே ஒரு சீனச் சார்பாளர் என்பதும் சீனாவைக் காட்டி இந்தியாவை மிரட்டுகிறார் என்பதும் உலகறிந்த உண்மை.

இந்தியப் பிரதமர் நரேந்திர மோடியைப் புகழ்வதன்மூலம் இந்தியாவையும்  தமிழில் பேசுவதன்மூலம் தமிழ்நாட்டையும் ஏமாற்ற இராஜபக்சே முயற்சிக்கிறார். அவரது மோசடிக்கு பாஜகவினர் பலியாகவேண்டாம் எனக் கேட்டுக்கொள்கிறோம்.

போர்க்குற்றங்களுக்காக ஐநா மனித உரிமைக் கவுன்சிலின் விசாரணைக்கு உள்ளாகியிருக்கும் இராஜபக்சே அதிலிருந்து தப்பிப்பதற்காகவே அவசரம் அவசரமாகத் தேர்தலை நடத்துகிறார். இராஜபக்சே மீண்டும் அதிபராவது ஈழத்தமிழர்களுக்கு மட்டுமல்ல தமிழ்நாட்டுக்கும் இந்தியாவுக்கும்கூட ஆபத்தாகவே முடியும். இதை இந்திய அரசும் பாஜகவினரும் புரிதுகொள்ளவேண்டும். இராஜபக்சேவின் தேர்தல் பிரச்சாரத்துக்குத் துணைபோவதைக் கைவிடவேண்டும் எனக் கேட்டுக்கொள்கிறோம்.

இவண்

தொல்.திருமாவளவன்