உள்ளாட்சி அமைப்புகளுக்கான இடைத்தேர்தல்களில் விடுதலைச் சிறுத்தைகள் பங்கேற்காது

உள்ளாட்சி அமைப்புகளுக்கான இடைத்தேர்தல்களில்
விடுதலைச் சிறுத்தைகள் பங்கேற்காது

உயர்நிலைக் குழுக் கூட்டத்தில் தீர்மானம்


விடுதலைச் சிறுத்தைகள் கட்சியின் உயர்நிலைக் குழுக் கூட்டம், சென்னை, அசோக் நகர், நூறடிச் சாலையிலுள்ள ‘வெளிச்சம்’ அலுவலகத்தில் 1-9-2014 திங்கள் காலை 10 மணி முதல் இரவு 7 மணி வரை நடைபெற்றது.  கட்சியின் தலைவர் தொல்.திருமாவளவன் தலைமையில் நடைபெற்ற இக்கூட்டத்தில் உள்ளாட்சி அமைப்புகளுக்கான இடைத்தேர்தலில் போட்டியிடுவது குறித்து விவாதிக்கப்பட்டு பின்வரும் தீர்மானம் ஒருமனதாக நிறைவேற்றப்பட்டது.



தீர்மானம்


செப்டம்பர் 18 அன்று நடைபெறவுள்ள உள்ளாட்சி அமைப்புகளுக்கான இடைத்தேர்தல்களில் அனைத்துக் கட்சியினரும் பங்கேற்பதற்குரிய கால அவகாசத்தைக் கொடுக்காமல் தமிழகத் தேர்தல் ஆணையம் திடீரென அறிவிப்புச் செய்துள்ளது.  இதனால், தமிழ்நாட்டில் ஆளுங்கட்சியைத் தவிர, பெரும்பாலான பிற கட்சிகள் இந்த இடைத்தேர்தல்களைப் புறக்கணிப்பது என முடிவு செய்துள்ளன.  தமிழகத் தேர்தல் ஆணையத்தின் இந்த அறிவிப்பு உள்ளாட்சி இடைத்தேர்தல்கள் சனநாயகபூர்வமாக நடைபெறுமா என்ற அய்யத்தை ஏற்படுத்தியுள்ளது. 


இந்நிலையில், இந்தத் தேர்தல்களில் பங்கேற்றுப் போட்டியிடுவதென்பது தமிழகத் தேர்தல் ஆணையத்தின் ஆளுங்கட்சிக்கு ஆதரவான எதேச்சதிகாரப் போக்குக்கு ஆதரவு அளிப்பதாக அமைந்துவிடும் என விடுதலைச் சிறுத்தைகள் கட்சி கருதுகிறது. 




எனவே, இந்த இடைத்தேர்தல்களில் விடுதலைச் சிறுத்தைகள் கட்சி பங்கேற்காமல் புறக்கணிப்பது என இந்த உயர்நிலைக் குழுக் கூட்டம் தீர்மானிக்கிறது.

இவண்
தொல்.திருமாவளவன்
தலைவர், விடுதலைச்சிறுத்தைகள் கட்சி