தமிழக அரசு மின் திருட்டையும் - ஊழலையும் தடுத்தாலே மின் கட்டணத்தை உயர்த்தவேண்டிய அவசியம் இருக்காது!

தமிழக அரசு மின் திருட்டையும் - ஊழலையும் தடுத்தாலே 
மின் கட்டணத்தை உயர்த்தவேண்டிய அவசியம் இருக்காது!

தொல்.திருமாவளவன் அறிக்கை


தமிழக அரசு மின் கட்டணத்தை உயர்த்தும் நோக்கத்துடன் தமிழ்நாடு மின்சார ஒழுங்கு முறை ஆணையத்தின் வாயிலாக மின்கட்டண உயர்வுக்குப் பரிந்துரை செய்துள்ளது. அதனடிப்படையில், அக்டோபர் மாதத்தில் மின் நுகர்வோர்களிடம் கருத்துக்கேட்பு நிகழ்வையும் நடத்துவதற்கு தமிழ்நாடு மின்சார ஒழுங்குமுறை ஆணையத்தின் வாயிலாக தமிழக அரசு திட்டமிட்டுள்ளது. இக்கருத்துக் கேட்பானது பொதுமக்களிடையே மின்கட்டண உயர்வுக்கு எதிர்ப்புகள் வலுப்பெற்றுவிடக்கூடாது என்பதற்காக நடத்தப்படுகிறது. ஏற்கெனவே, உணவுப் பொருட்களின் கட்டுக்கடங்காத விலையேற்றத்தால் சாமானிய மக்கள் பெரிதும் பாதிப்புக்குள்ளாகியுள்ள நிலையில் தற்போது மின்கட்டணத்தையும் உயர்த்தினால் எவ்வாறு அவர்களால் தாங்கிக்கொள்ள இயலும். 


தமிழ்நாடு மின்வாரியத்திற்கு ரூபாய் 6854 கோடி பற்றாக்குறை ஏற்பட்டுள்ளதாக மின்சார ஒழுங்குமுறை ஆணையம் அறிக்கை வெளியிட்டுள்ளது. தமிழ்நாடு மின்வாரியத்தில் காலங்காலமாகத் தொடரும் மின் திருட்டையும் மின் உற்பத்தி நிலையங்களில் நடைபெறும் பெருமளவிலான ஊழல்களையும் தடுத்து நிறுத்தினாலே மின்கட்டணத்தை உயர்த்தவேண்டிய தேவையோ, தமிழக அரசு அதற்கான மானியத்தை அளிக்கவேண்டிய தேவையோ இருக்காது. எனவே, தமிழக அரசு மின்கட்டணத்தை உயர்த்தும் எண்ணத்தைக் கைவிடவேண்டுமென விடுதலைச் சிறுத்தைகள் கட்சி கேட்டுக்கொள்கிறது. 

இவண்
தொல்.திருமாவளவன்