கோவை மாநகராட்சிக்கான மேயர் வேட்பாளர் - வெல்ஃபர் பார்ட்டி ஆஃப் இந்தியா கட்சிக்கு விடுதலைச் சிறுத்தைகள் கட்சி ஆதரவு

எதிர்வரும் செப்டம்பர் - 18 அன்று நடைபெறவுள்ள உள்ளாட்சி அமைப்புகளுக்கான இடைத்தேர்தல்களில் விடுதலைச் சிறுத்தைகள் பங்கேற்பதில்லை என கடந்த 01.09.2014 அன்று கட்சியின் உயர்நிலைக் குழுவில் தீர்மானிக்கப்பட்டுள்ளது. அதன்படி கட்சியின் சார்பில் வேட்பாளர்கள் யாரும் போட்டியிடவில்லை என்பதுடன், யாருக்கும் ஆதரவு அளிக்கவுமில்லை. 

இந்நிலையில், இசுலாமிய இயக்கங்களின் கூட்டமைப்புக்கான ஒருங்கிணைப்பாளர் திரு.அப்போலோ அனிஃபா அவர்கள் 06.09.2014 அன்று நேரில் சந்தித்து, வெல்ஃபர் பார்ட்டி ஆஃப் இந்தியா கட்சியின் கோவை மாநகராட்சி மேயர் வேட்பாளர் திரு.இப்ராஹிம் அவர்களுக்கு மட்டும் ஆதரவு அளிக்குமாறு கேட்டுக்கொண்டார்.

அத்துடன், வெல்ஃபர் பார்ட்டி ஆஃப் இந்தியா கட்சியின் மாநிலத் தலைவர் திரு.செ.நா.சிக்கந்தர் அவர்கள் 08.09.2014 இன்று வேளச்சேரி அலுவலகத்தில் நேரில் சந்தித்து தமது கட்சியின் வேட்பாளர் திரு.இப்ராஹிம் அவர்களுக்கு ஆதரவு கோரி கடிதம் வழங்கினார்.

இதனடிப்படையில், விடுதலைச் சிறுத்தைகளின் நிலைப்பாட்டைச் சற்று தளர்த்தி, கோவை மாநகராட்சிக்கான மேயர் வேட்பாளராக வெல்ஃபர் பார்ட்டி ஆஃப் இந்தியா கட்சியின் சார்பில் போட்டியிடும் திரு.இப்ராஹிம் அவர்களுக்கு ஆதரவளிப்பது என முடிவு செய்யப்படுகிறது. 

கடந்த 2011 ஆம் ஆண்டு நடைபெற்ற உள்ளாட்சித் தேர்தலில் இசுலாமிய அமைப்புகளுடன் கூட்டணி அமைத்து, கோவையில் அப்போது போட்டியிட்ட இசுலாமிய வேட்பாளரை விடுதலைச் சிறுத்தைகள் ஆதரித்தது. அதே அடிப்படையில், தற்போது நடைபெறவுள்ள இடைத்தேர்தலிலும் கோவை மேயர் வேட்பாளர் திரு.இப்ராஹிம் அவர்களை ஆதரிப்பது என கட்சி முடிவு செய்கிறது. 

இதனடிப்படையில் விடுதலைச் சிறுத்தைகள் கட்சியின் கோவை மாவட்ட பொறுப்பாளர்கள் வெல்ஃபர் பார்ட்டி ஆஃப் இந்தியா கட்சியின் மேயர் வேட்பாளர் திரு.இப்ராஹிம் அவர்களின் வெற்றிக்கு முழுமையாக, தீவிரமாகக் களப்பணியாற்ற வேண்டுமென அறிவுறுத்தப்படுகிறது.

இவண்,
தொல்.திருமாவளவன்