தகுதித் தேர்வின் அடிப்படையில் பட்டதாரி ஆசிரியர்களுக்கு பணி வழங்க வேண்டும்

தகுதித் தேர்வின் அடிப்படையில் பட்டதாரி 
ஆசிரியர்களுக்கு பணி வழங்க வேண்டும்

தொல்.திருமாவளவன் வலியுறுத்தல்


பட்டதாரி ஆசிரியர்கள் நியமனத்தில் பதிவு மூப்பு முறை கடந்த ஆட்சியின்போது பின்பற்றப்பட்டது. ஆட்சி மாற்றம் ஏற்பட்டதற்குப் பிறகு தகுதித் தேர்வு நடத்தி அதில் 150 மதிப்பெண்ணுக்கு 90 மதிப்பெண்கள் எடுத்தால் அவர்களுக்கு ஆசிரியர் பணி வழங்கப்படும் என அறிவிக்கப்பட்டது. அதனடிப்படையில், கடந்த 2011-12ஆம் ஆண்டில் பணி நியமனங்கள் செய்யப்பட்டன.

2013 ஆகஸ்டு 18 அன்று நடைபெற்ற தகுதித் தேர்வில் ஆறரை இலட்சம் பேர் கலந்துகொண்டனர்.  அவர்களில் 14,700 பேர் 90 மதிப்பெண்களுக்கு மேல் எடுத்துத் தேர்ச்சி பெற்றனர். கடந்த சனவரி மாதத்தில் அவர்களுக்கு சான்றிதழ் சரிபார்ப்பு முடிந்தது.  பணிநியமன ஆணை வழங்கப்படும் என அவர்கள் எதிர்பார்த்திருந்த நிலையில் ‘வெயிட்டேஜ்’ முறை என ஒன்றைப் புதிதாகப் புகுத்தி தேர்ச்சி பெற்றிருந்த ஆயிரக் கணக்கானோருக்கு பணி கிடைக்காத நிலையை தமிழக அரசு ஏற்படுத்தியுள்ளது.

தகுதித் தேர்வில் கலந்துகொண்டு அதிகமான மதிப்பெண்கள் பெற்றிருந்த போதிலும் இந்தப் புதிய முறையின் காரணமாக சுமார் 10,000 பேர் பாதிக்கப்பட்டுள்ளனர்.  இதே நிலை நீடித்தால் எதிர்காலத்திலும்கூட அவர்களுக்கு ஆசிரியர் பணி கிடைப்பதற்கு வாய்ப்பற்ற நிலை உருவாகியுள்ளது.  தேர்வில் வெற்றி பெற்றும் பணி கிடைக்காமல் பாதிக்கப்பட்டவர்கள் தமிழக அரசின் கவனத்தை ஈர்ப்பதற்காக கடந்த பல நாட்களாக பல்வேறு போராட்டங்களை நடத்தி வருகின்றனர். நேற்றைய தினம் அவர்களில் 4 பேர் விஷமருந்தித் தற்கொலைக்கு முயன்ற நிலையில்,  தற்போது மருத்துவமனையில் சேர்க்கப்பட்டுள்ளனர்.

தகுதித் தேர்வில் தேர்ச்சி பெற்று சான்றிதழ் சரிபார்க்கப்பட்ட அனைவருக்கும் பணி ஆணை வழங்குவதே ஞாயமானதாகும்.  இந்தப் பிரச்சனையில் தமிழக அரசு உடனடியாகத் தலையிட்டு பாதிக்கப்பட்டவர்களுக்குப் பணி ஆணை வழங்க வேண்டுமென விடுதலைச் சிறுத்தைகள் கட்சி வலியுறுத்திக் கேட்டுக்கொள்கிறது.

இவண்
தொல்.திருமாவளவன்